Dinagsa ng tulong mula sa mga kababayan ang matandang lalaking ito matapos mag-viral ang kaniyang litrato kung saan makikita siyang putikan, hindi lamang ang katawan ang may bakas ng tuyong putik, kundi pati na rin ang kaniyang mukha.
Ito ay matapos umano niyang tumakbo upang makahabol at makakuha ng mga ipinamimigay na relief goods para sa mga nasalanta ng bagyo, gayun pa man, wala na siyang naabutan.
Nito lamang nakaraan, sunod-sunod na bagyo ang sumalanta sa Pilipinas, partikular na sa Luzon. Labis ang epekto ng mga bagyong ito, lalo na ang huli, ang bagyong Ulysses. Ang Cagayan Valley at Isabela ang nagtamo ng pinakamatinding pinsala kung saan umabot hanggang sa 15 metro ang taas ng tubig baha.
Lumubog ang mga bahay at tanging sa bubong na lamang ng matataas na bahay naghihintay ng saklolo ang mga residente.
Matapos ang unos na sumira sa mga ari-arian ng tao, halos wala nang natira sa kanila.Gutom at uhaw, isa pang pagsubok para sa mga ito.
Kung kaya naman, wala nang iba pang maaasahan kundi ang mga relief goods na matatanggap sa gobyerno at iba pang mga tulong mula sa iba’t-ibang organisasyon ng mga kababayan.
Sa isang viral video ni @itsmecarlo19 sa Tiktok, isang social media platform kung saan maaring makadiskubre at magbahagi ng maiikling video, makikita ang matandang lalaki, puno ng alikabok at natuyong putik ang mukha, mababakas ang lungkot dahil walang mauuwing pagkain sa pamilya. Kinilala itong si Lauriano Anung Pattaui ng Barangay San Isidro, Iguig sa Cagayan.
Ibinahagi naman ng netizen na si Apreil-Jhoiyzhe Juan Cabacungan-Bacuyan ang naturang video. Dahil dito, marami ang naghandog ng tulong kay tatay Lauriano.
Sa tulong ni Apreil ay mabilis na natunton ang lalaki. Nabigyan ito ng mga pagkain at iba pang pangangailanganng pamilya.
Isa lamang si tatay Laurianosa libo-libong residente ng Cagayan na apektado ng bagyong Ulysses.
Nabigo at nadapa man sa una, patuloy pa ring babangon.
Source: The Relatable
No comments